Ginpaathag sang Hospital Management Office sang Iloilo Province ang importansya sang referral system sa mga District Hospital.
Sa interview sang Bombo Radyo kay Dr. Paz Calopiz, Hospital Management Officer, iya ginpahayag nga kon ma-abot sa ospital ang pasyente, dapat nga batunon ini bisan ano pa nga sahi sang iya emergency case.
Suno kay Calopiz, insigida man mismo nga dapat mahibaluan sang doctor kon bala ang pasyente kinahanglan nga ma-admit ukon indi, mahimo i-refer sa higher facility, ukon papulion.
Ginpahayag man sini nga kon matumod nga kinahanglan nga i-refer ang pasyente, dapat siguraduhon nga madul-ong ini sang ambulansya.
Gin-athag man sang natungdan nga kon indi available ang ambulansya, mahimo nga magpangayo sang bulig sa kaingod nga mga banwa.
Ginklaro man ni Calopiz nga indi insigida nga maka-transfer ang isa ka doctor halin sa public hospital kon ini ang wala pa nakapakig-angot kag mabaton sang receiving hospital.
