Suportado ni Mamamayang Liberal (ML) Partylist representative Leila de Lima ang tikang sang aktres nga si Nadine Lustre nga mag-file sang complaint kasunod sang iya gin-alegar nga mga atake sa iya online.
Nangin target ang singer-actress sang mga pagpang-harass kag malain nga komento sa social media kaangot sa iya political views sa bag-o lang nagtakop nga eleksyon sa Pilipinas.
Isa siya sa mga nagapanguna nga naga-endorso sang ML Partylist.
Pahayag ni De Lima, tuman ka importante ang pag-file sang reklamo kaangay sini bangud naandan na nga ginagamit ang social media subong agud nga pahipuson ang mga nagahambal para sa hustisya kag reporma.
Ginagamit man suno kay De Lima ang plataporma para gub-on ang kuntani maayo nga diskurso kag bayluhanay sang opinion. Bisan pa may yara sang freedom of expression suno sa representative-elect, dapat nga indi ini paggamiton sa pagtapak sa kinamatarong, dignidad, kag demokrasya.
“This is a necessary step in a time when social media is being used to silence voices that speak for justice and reform. Ginagamit ang mga plataporma para buwagin ang makabuluhang diskurso at palitan ito ng galit at paninira,” kabahin sang statement ni De Lima.
Wala pa sang dugang nga statement nga ginpaguwa si Nadine kun sanday sin-o ang iya gin-reklamo.
Apang may impormasyon nga nahatag ang boyfriend sini nga si Christophe Bariou kun ano nga klase sang harassment ang nahimo kay Nadine: “Imagine if your girlfriend, wife, sister, mother, or daughter were publicly threatened with rape for simply expressing her opinion.”
Nahibaluan nga sa idalom sang Safe Spaces Act, ukon sa Republic Act No. 11313, ang gender-based sexual harassment (GBSH) sa public spaces, online, workspaces, kag educational institutions ang mahimo madagdagan sang penalidad sa idalom sang layi.#
