Ginpahayag sang Brgy. Official sang Brgy. Botong, Oton nga wala sang ano man nga record sa ila Barangay ang rider nga nagtuyo maghimulos sa 19-anyos nga dalaga sang Mayo 18 sa Brgy. Pulo Maestra Vita, Oton, Iloilo.
Sa interview sang Bombo Radyo kay kagawad Joery Basco, committee sang peace and order sang Brgy. Botong, Oton, iya ginpahayag nga masami man nila makita ang nasambit nga rider bangud nagahampang ini sang basketball sa Brgy. Hall sa amo nga Barangay.
Suno sa iya, nakibot nalang ini sila sang may naglapta nga balita, bangud sa pagkilala nila hipuson kag wala sang involvement sa bisan ano nga kinagamo ang amo nga rider kun sa diin tumandok gid ini sang nasambit nga lugar.
Ginkumpirmar man ni Basco nga madamo sila sang may nabaton nga report kun sa diin may asawa na ang nasambit nga rider apang wala pa sang bata.
Dugang pa sang natungdan, sumugod nga naggwa ang balita batok sa rider, wala na ini makita sa iya puluy-an ukon sa palibot nga Barangay.
