Duha ka mga eskwelahan sa Iloilo ang ginkilala nga top performing schools sa May 2025 Chemical Engineers Computer-Based Licensure Examination.
Ini amo ang Central Philippine University kag ang University of the Philippines Visayas-Iloilo City.
Sandig sa resulta nga gin-release sang Professional Regulation Commission subong nga gab-i, nagapanguna ang UP Iloilo City nga may 100% nga passing rate.
Naka-produce man ini sang topnotcher nga si Aaron Paul dela Cruz Infante, Rank 2, nga may rating nga 88.50%.
Magluwas diri, yara man sa lista ang CPU nga nagapang-apat sa nagapanguna nga mga eskwelahan. 12 sa 13 ka examinees halin sa amo nga unibersidad ang nakapasar ukon katumbas sang 92.31% nga rating.
Base sa PRC, kabug-usan nga 799 ka mga indibidwal ang nagkuha sini nga exam subong nga bulan, apang 602 lamang ang nakapasar.
Ginpatigayon ang Chemical Engineering board exams sang May 21-23, 2025, sa PRC testing centers sa NCR, Baguio, Cagayan de Oro, Cebu, Davao, Iloilo, Legazpi, Lucena, kag Rosales.
