Natalana nga ipasaka sang kapulisan ang panumbungon nga attempted rape batok sa rider nga nagtuyo nga maghimulos sa 19-anyos nga pasahero sini sang Mayo 18 sa Brgy. Pulo Maestra Vita, Oton, Iloilo.
Sa interview sang Bombo Radyo kay Police Captain Lunelyn Talamillo, deputy chief of police sang Oton Municipal Police Station, iya ginpahayag nga sa Lunes posible nga ma-file ang complaint.
Ini kasunod sang mga ebidensya nga natipon sang estasyon lakip na ang ginakabig concrete evidence nga amo ang pagsanto sang ila person of interest sa tawo nga amo ang ginpa-verify sa Land Transportation Office (LTO) Region 6 nga nagapanag-iya sang plate number sang motorsiklo nga gingamit sang rider.
Daku man nga bulig suno kay Talamillo ang pagkooperar sang witness nga naka-execute na sang iya nga affidavit nga amo subong ang ginapreparar sang imbestigador.
Pahayag pa sini, na-identify man sang dalaga ang itsura sang rider kag ginkumpormehan man sang testigo nga amo ang nakabulig sa amo nga babaye sang gintuyo ini nga i-rape. Desidido man ang kampo sang babaye nga ipadayon ang pag-file sang panumbungon.
Sa bahin sang kapulisan, ginpasalig man ni Talamillo nga may tracker team sila agud ma-monitor kag madakpan ang rider pananglitan may idagdag na ang korte nga warrant of arrest.
Matandaan nga sa bahin sang LTO 6, maga-isyu man ini sang show cause order sa rider. Kun makasabat, ipasa ini sa legal office agud matumod kon bala kinahanglan nga i-revoke ukon i-suspend ang lisensya sini.
