Ginalantaw nga madugangan pa ang mga electric taxi nga maga-operate sa syudad sang Iloilo.
Ini kasunod sang duha na ka electric vehicle (EV) units sang Quarry Taxi nga naka-abot sa syudad nga amo man ang labing-una una diri sa Western Visayas.
Sa interview sang Bombo Radyo kay Jered Alarba, manager sang Quarry Taxi, iya ginpahayag nga ginaplanuhan na ini subong depende man kun maayo ang mangin operasyon sang duha ka nauna nga units.
Suno kay Alarba, posible nga magalab-ot sa minimum nga P2,000 ang arkila sa electric taxi kada adlaw, apang indi naman pierde ang driver suno sa iya bangud indi naman kinahanglan pa magpa-tughong sang gasolina indi kaangay sa tradisyonal nga taxi.
Kun fully-charged ang unit, sarang ini makadalagan sang tubtub sa 400-kilometros.
May nalakip man nga portable charger sa kada unit suno kay Alarba, kag may libre nga charging station sa garahe sang Quarry Taxi diri sa Iloilo City.
Gindayaw naman sang isa ka driver nga si Lamer Apura ang electric taxi matapos nga nag-test ini sa pagsakay sa unit. Pahayag sini, indi maglakat ang taxi kun wala pa nakumpleto suksok sang driver ang safety gear; naga-appear man suno sa iya kun kulang sa hangin ang goma; kag madasig nga ma-detect pananglitan may problema.
Nahibaluan nga ang duha ka units nga nag-abot sa syudad ang nagapaidalom pa sa permitting process santo sa nakasaad sa Land Transportation Franchising and Regulatory Board (LTFRB) Memorandum Circular 2024-007.
Diri nga circular ginaplastar ang requirements sa pag-secure sang Certificate of Public Convenience nga importante para sa legal operation sang electric taxis.
Nauna na nga nagpaguwa sang statement ang Land Transportation Office (LTO) Region 6 nga naga-abi-abi sa sini nga units nga ginakabig man nga daku nga tikang para ma-promote ang environment-friendly transportation sa Iloilo kag masunod man ang modernization program sang gobyerno.
