Nagapadayon ang Bureau of Fisheries and Aquatic Resources (BFAR) sa ila marine research missions sa West Philippine Sea (WPS) apisar sa padayon nga agresyon kag pang-harass sang China Coast Guard (CCG).
Ginpahayag ni BFAR spokesperson Nazario Briguera nga indi ini ang una nga insidente sang pagpang-boba sang water cannon sa ila barko kag indi ini magapugong sa ila nga padayunon ang trabaho sang ahensya.
Ginkumpirmar man sang BFAR nga ginbombahan sang tubig kag ginbunguan sang barko sang CCG ang ila mga barko nga BRP Datu Sanday kag BRP Datu Pagbuaya samtang naga-misyon sa
Pag-asa Cay 2 (Sandy Cay).
Ang nasambit nga misyon amo ang pagkuha sang mga sand samples bilang kabahin sang marine
scientific research.
Apisar sa agresyon sang Chinese Coast Guard kag maritime militia, natapos sagihapon sang Philippine scientific team ang ila operasyon sa Pag-asa Cays 1, 2, kag 3.
Suno sa ahensya ang insidente natabo sa sulod mismo sang territorial sea sang Pilipinas nga sakop sang Kalayaan Island Group sa West Philippine Sea.
Samtang, nagpgwa naman sang pahayag ang China Coast Guard nga ila ginpatuman ang “control measures” batok sa Philippine vessels nga gin-akusahan nga “ilegal” nga nagsulod sa Subi Reef kag Sandy Cay.
Sa pihak nga bahin, ginpanginwala ni Briguera ang akusasyon sang China kag ginpabutyag nga may mga ebidensya nga magapakita kun sin-o ang may sala.
Ginpat-od man sang BFAR nga daku ang perwisyo nga gin-resulta sang insidente sa ila barko, kag posible nga maglapaw pa sa pila ka million ka pesos ang ginabanta nga magasto sa pagpakay-o.
