Gin-kondena sang duha ka senador ang bag-o nga insidente sang agresyon sang China Coast Guard (CCG) batuk sa duha ka barko sang Pilipinas nga yara malapit sa Pag-asa Cay 2 sa West Philippine Sea.
Nagakatabo ang insidente samtang nagapadayon sang routine mission ang mga sakayan sang Bureau of Fisheries and Aquatic Resources (BFAR) kaupod ang scientific team agud magkuha sang sampol sang balas sa lugar.
Ginpahayag ni Senador Jinggoy Estrada, Chairman sang Senate Committee on National Defense nga indi na kahibalo ang publiko sa madugay na nga pagpanghilabot sang China sa maritime scientists kag mga uniformed personnel.
Iya pa ginpanugyan nga magpasaka ang Pilipinas sang isa ka mabaskug kag klaro nga diplomatiko nga protesta batuk sa padayon nga paglapas sang China sa mga internasyonal nga layi.
Dugang pa ni Estrada, kinahanglan sang Pilipinas nga palaparon kag pabaskugon pa ang alyansa sini sa mga pungsod nga pareho sang panindugan para sa kalinong, kag pagrespeto sa layi sa rehiyon.
Sa pihak nga bahin, nagapanawagan man si Senador Joel Villanueva sa Department of Foreign Affairs (DFA) nga tun-an ang tanan nga posible nga tikang agud dayon makapasaka sang bag-o nga diplomatiko nga protesta kontra sa China.
