Patay ang 30-anyos nga lalaki matapos gintiro sa Brgy. Cato-ogan, Pototan, Iloilo.
Ang biktima amo si Kenneth De Asis, samtang ang ginatudlo suspek amo kanday Alyas Pula kag Alyas Tagi lunsay residente sang nasambit nga barangay.
Sa interview sang Bombo Radyo kay Jocelyn De Asis, Iloy sang biktima, iya ginpahayag nga nagpanawag ang mga suspek sa ila puluy-an kag ginapangita ang iya bana nga amay sang biktima kag ginpahayag nga ginpakitaan ini ni Alyas Pula sang armas nga nataklos sa iya hawak.
Didto na kag nagdalagan papalayo si Jocelyn kag nakasulod sa ila puluy-an ang mga suspek apang wala sang mga ini nakita ang amay sang biktima sa baylo, si Kenneth ang ila nakita kag ginlagas.
Nakabati nalang ang mga katupad balay sini sang tatlo ka lupok kun sa diin may ara sang gunshot wound ang biktima sa iya ulo.
Pahayag sang pamilya sang biktima, may nakita ini sila nga basiyo 15 tubtob 20 metros gikan sa lawas sang biktima.
Wala naman sang ginatan-aw nga motibo ang pamilya sang biktima kun ngaa ini ang gintiro-patay.
Ginpahayag man sang natungdan nga si Alyas Tagi amo ang tag-iya sang duta nga ginatindugan sang ila balay ginabulubanta 30 na ka tuig.
Nagsungka naman si Alyas Tagi kag ara subong sa kustodiya sang Pototan Municipal Police Station samtang padayon nga ginapangita si Alyas Pula.
