Patay ang isa ka pahinante samtang pilason naman ang tatlo pa gid ka sakay matapos nga natumba ang close van nga may karga nga isda sa Sitio Lumboy Brgy. San Juan, Barotac Viejo, Iloilo.
Ang ginbawian sang kabuhi amo si Alyas Arnold, 55-anyos, single samtang ang driver amo si Vincent, 39-anyos, single, pahinante nga kanday Alyas Ronnie, 57-anyos, kasado kag lunsay residente sang Brgy. North Fundidor, Molo, Iloilo City kag Alyas Apa, legal ang pang-edaron kag residente sang Brgy. Tiwi, Barotac Nuevo, Iloilo kag ginpahayag nga lunsay nagakasakay sa front seat.
Sa interview sang Bombo Radyo kay Police Major Ciriaco Esquilarga, Hepe sang Barotac Viejo Municipal Police Station, iya ginpahayag nga halin ini sila sa Estancia bangud nagkuha sang ginabulubanta 4 ka tonelada nga bangrus kag padulong na kuntani sa Molo, Iloilo City.
Paglab-ot sa kurbadahon kag likuon nga bahin sang dalan, wala nagkagat ang preno sang close van rason nga nadulaan ini sang control kag natumba sa tuo nga bahin.
Bangud sa pagtakilid sang van, napilpilan ang isa ka pahinante nga nagapungko malapit sa bintana kag nakaagum sang patal nga pilas sa iya ulo nga gintunaan sang iya kamatayon samtang, gasgas kag pagpalanakit sang lawas naman sa tatlo pa gid ka sakay.
Ginpahayag sang natungdan nga makapila na ka beses nga may salakyan nga nadisgrasya sa amo nga dalan.
Text by: Bombo Pauline Pillora
