Anum nga mga bulawan nga medalya ang natipon sang mga atleta sang Western Visayas sa imbukada nga adlaw sang mga hinampang sa Palarong Pambansa 2025.
Ini ang nagabutang sa Rehiyon VI sa ikatatlo nga pwesto sa latest medal tally, sunod sa defending champion nga National Capital Region kag sa CALABARZON.
Ang gold medalists sang Region VI (as of broadcast time) amo sanday:
- Josh Gabriel Salcedo sang Valderrama, Antique kag bugal sang Antique Vocational School nga nagpangibabaw sa Discus Throw Secondary Boys Finals.
Magluwas nga gold medalist, nakahimo ini sang bag-o nga record nga 45.52 meters nga amo ang nagguba sa nauna nga Palaro record nga 42.86 meters nga gin-set sang tiglawas man sang Western Visayas nga si Airex Villanueva sang nagpasakop ini sa kumpetisyon sa Marikina City sang 2023.
- Angel Villagracia, estudyante sang Capiz National High School, nga nagpangibabaw sa Secondary Girls 100m hurdles finals.
Ini na ang ikatatlo nga Palaro nga nakabulsa ini sang gold medal kun sa diin gold medalist ini anay sa 100 meter Hurdles Secondary Girls sa Palarong Pambansa 2023 sa Marikina, City; kag gold medalist man sa kapareho nga event sang nakaligad nga tuig nga ginhiwat sa Cebu City.
- Miko Ferrer Villaran sang Romanito Maravilla National High School sa Bacolod City Negros Occidental nga nangibabaw sa 100m hurdles men’s secondary event. Sa Cebu sang nagligad nga tuig, gold medalist man siya sa secondary boys 400-meter hurdles kag sa secondary boys 110-meter hurdles.
- Melchor III G. Bataican sang Iloilo City nga nagdaog sa Doble Baston Individual (Arnis). Myembro si Melchor sang Iloilo City Sports Academy.
- Eda Mae Arceo sang Carles, Iloilo nga nagpanguna sa 100m Hurdles – Elementary Girls Category.
Nagatiniil lang si Eda samtang naga-compete. Ini nga 12-anyos nga student-athlete ang naga-eskwela sa Carles Central Elementary School. Ini man ang iya una nga pagpasakop sa Palarong Pambansa.
- Ayena Dhawn Cabalfin nga tumandok man sang Carles kag nangibabaw sa 400m final elementary girls category.
Bugal sang Barosbos Elementary School si Cabalfin nga nakadaog man anay sang gold, silver, kag bronze medals sang nagpasakop ini sa Palarong Pambansa sa Cebu sang 2024.
Ang duha gina-coach nanday Leone Tiosayco kag Benedicto Prasas.
Nagbukas ang Palarong Pambansa 2025 sa Laoag, Ilocos Norte sang Sabado kag opisyal nga magatakop sa Hunyo 2.#
