Linibo nga mga residente sa isa ka banwa, ‘na-high’ matapos nahaklo ang aso halin sa marijuana nga ginpangsunog sang otoridad

Nakibot ang masobra sa 25,000 residente sang banwa sang Lice sa Diyarbakir pro­vince sa Turkey matapos ginsunog sang mga otoridad ang masobra sa 20 ka tonelada nga nakum­piskar nga marijuana.

Bangud sa madamol nga aso, wala nakabukas sang bintana ang mga tawo kag wala man nakagwa sa sulod sang lima ka adlaw.

Madamo ang nakaeksperyensiya sang paglingin sang ulo, pagsuka, hallucination kag iban pa nga mga sintomas bangud sa nahaklo nga aso.

Suno sa isa ka grupo, apisar madinalag-on ang kampanya batok sa droga, sala ang nangin pamaagi sang pagsunog.

Ginsuhestyon sang grupo nga sa mas safe nga lugar kag may yara sang filter patigayunon ang kaangay nga operasyon agud malikawan ang epekto sa ikaayong lawas sang mga residente.