Nagdangat sa P510,000 ang balor sang iligal nga droga nga nakumpiskar sa isa ka subject sa drug buy bust operation sa Brgy. San Antonio, Oton, Iloilo.
Ang arestado tumandok man sang amo nga lugar kag ginakabig sang awtoridad nga high value individual (HVI).
Sa interview sang Bombo Radyo kay Police Lieutenant Colonel Abner Jordan, officer-in-charge sang Oton Municipal Police Station, iya ginpahayag nga 75 grams sang ginapasuni nga shabu ang nakuha sa subject sa operasyon nga ginpatigayon matapos ang apat tubtob anum ka bulan ang monitoring.
Suno kay Jordan, nagasaylo-saylo sang lugar ang subject sa kaiping nga kabarangayan ukon sa iya mga barkada sa banwa kun mamutikan sini nga gina-monitor siya sang mga operatiba.
Wala pa ini sang gintuad sa kapulisan kun sa diin siya nagakuha sang suplay. Wala man ini sang previous record sa illegal drugs suno pa sa Oton MPS.
Natalana ini nga mag-atubang sa panumbungon nga paglapas sa Republic Act 9165 ukon sa Comprehensive Dangerous Drugs Act of 2002.#
