Nagpakig-upod ang Pilipinas kag South Korea sa pag-implementar sang $16 million nga grant para sa duha ka proyekto nga nagatuyo sa pagpasanyog sang aquaculture development kag community-based agribusiness.
Ginpahayag sang Department of Agriculture (DA) nga ang grant nga ginpirmahan upod sa Korea International Cooperation Agency (Koica) ang magapadali sang implementasyon sang multiyear projects para sa mga mangunguma kag mangingisda.
Ang una nga undertaking ang ginatawag Capacity Building on Aquaculture Development for Income Increase of Fisherfolk sa Probinsya sang Guimaras. Ini nagatuyo sa pagbulig sa mga mangingisda nga madugangan ang ila kita paagi sa pagpabakod sang produksyon sang aquaculture kag value chain. Ini ipatuman sa sulod sang pito ka tuig.
Ini nga inisyatibo, nga nakabaton sang grant nga $10 million, nagalakip sang pagpauswag sang imprastraktura sa aquaculture pareho sang sistema sang hatchery kag pilot pond para sa mga high-value species.
Nagalakip man ini sang pagbalhin sang mga advanced aquaculture technologies paagi sa capacity-building programs kag ang pagpauswag sang mga istruktura sang operasyon sang negosyo para sa mga kooperatiba.
