Isa ka police academy sa Japan ang nagatudlo sa ila nga mga lalaki nga kadete nga mag-makeup.
Kalakip na ang makeup training sa academy.
Ini amo ang Fukushimaken Keisatsugakko Police Academy sa Fukushima Prefecture nga nagapatuman sang pinasahi nga klase, kun sa diin ginatudluan ang 60 kadete kun paano maghimos sang kaugalingon gamit ang makeup kag husto nga grooming.
Suno sa akademya, kabahin ini sang pagtudlo sang importansya sang katinlo kag pagpabilin sang propesyonal nga imahe sa publiko.
Nakigbuylog ang akademya sa kilala nga Japanese cosmetics brand nga Shiseido, nga nagpadala sang ila nga mga beauty consultant para magtudlo sang insakto nga pag-moisturize sang panit, pagkay-o sang kilay kag buhok kag iban pa.
Magluwas sa Fukushima, ang Yamaguchi Police Academy ang nagahimo man sang amo nga programa kun sa diin ginatudluan ang mga pulis kun paano tinluan ang nawong.
