Duha gid ka bulawan nga medalya ang nakuha sang tumandok sang Passi City nga si Kate P. Pardilla sa nagapadayon nga Palarong Pambansa 2025.
Kampyon siya sa Standard Individual Chess amo man sa Standard Team Chess kun sa diin kaupod sini ang taga-Iloilo City nga si Thea Grace Clar.
Si Pardilla ang naga-eskwela sa Passi I Central School kag nagatiglawas sang Western Visayas sa sini nga sports event.
Nagpalab-ot man sang pagpanginbulahan ang local government unit sang Passi kasunod sang kadalag-an sini.
“Representing Western Visayas, Kate demonstrated brilliance, strategy, and determination as she outplayed the best young chess players from all over the Philippines,” kabahin sang social media post sang LGU.
Suno pa sa local government, sang 2024, naka-upod ni Pardilla sa paghampang sang chess ang billiards legend nga si Efren “Bata” Reyes kadungan sang 1st Mayor Stephen A. Palmares 9-Ball National Open Championship sa City of Passi Arena — bagay nga suno sa LGU, “a quiet yet powerful sign of the champion she would become.”
As of press time, nagapang-apat ang Western Visayas sa medal tally sa sini nga multi-sport event sa Laoag, Ilocos Norte nga may 29 ka gold medals.#
(Photo: Palarong Pambansa -Chess/FB)
