Nagpanugyan ang Iloilo City Health Office (IPHO) sa publiko nga magpadayon gihapon sa paghalong batuk sa Mpox, bisan pa man nga nag-ayo na ang isa ka kumpirmado nga kaso sa probinsya sang Iloilo.
Sa interview sang Bombo Radyo kay Dr. Rodney Labis, head sang IPHO, iya ginpahayag nga nag-ayo na ang pasyente nga positibo sa Mpox halin pa sang Mayo 23, base sa ila pinakaulihi nga medical assessment.
Suno kay Labis, ang tanan nga lesions ukon pilas sang pasyente ang fully healed na, kag wala na sang aktibo nga sintomas nga ginapakita ang pasyente humalin pa sang nagligad nga semana.
Ginkumpirmar man ni Dr. Labis nga ang lima ka close contacts sang pasyente nga yara sa sulod sang panimalay wala man sang ginapakita nga sintomas tubtob subong.
Sila ang padayon nga naka-home quarantine kag ginatapos na lang ang ila 21-day quarantine period nga matapos sa June 12.
Ginpahanumdom sang IPHO ang publiko nga magpabilin alerto kag maghalong, lakip na ang pagsunod sa health protocols kag pag-report gilayon sa health authorities kun may ginabatyag nga sintomas kasubong sang hilanat, rashes, kag sakit sang kalawasan.
