Nagpaathag ang Philippine Coast Guard nga naangot sa repair kag rehabilitation sang San Juanico Bridge sa Leyte ang pagdamo sang mga truck sa roll-on-roll-off (RoRo) port sa Dumangas Port sa Dumangas, Iloilo.
Sa interview sang Bombo Radyo kay Lieutenant Junior Grade Danilo Nicdao, commander sang PCG Dumangas Substation, iya ginpahayag nga halos duha ka semana na nga amo sini ang pagpug-ok sang sitwasyon sang mga salakyan bangud sa paglain sang ruta sang trucking services.
Suno kay Nicdao, ang iban sa sini nga mga truck ang nagikan pa sa Luzon pakadto sa Panay antes makaabot sa Leyte.
Indi sigurado suno sa opisyal kun tubtub san-o nga amo sini ang sitwasyon ilabi na bangud posible madugayan ang pagkaayo sa San Juanico Bridge.
Apang pahayag sini, magapatigayon sila sang pagsinapol kaupod sa local government unit kag sa Philippine Ports Authority agud ma-address ang problema ilabi na bangud madamo sang pribado nga salakyan pakadto sa Negros Island ang apektado.
Mas pabaskuron man ang maritime security suno kay Nicdao amo man ang pre-departure inspection bangud madamo sang posible iligalidad nga matabo kun kaangay sini nga madamo man ang nagaagi sa pantalan.
Nahibaluan nga halin sang Mayo 15, may yara sang three-ton load limit sa San Juanico Bridge matapos ang assessment nga may significant structural compromises sa taytay.
Bangud sa sini nga restriction, apektado ang heavy cargo vehicles nga rason sang disruption sang pagdul-ong sang suplay sang pagkaon, bulong, agricultural products, construction materials, kag iban pa nga essential commodities sa rehiyon.
