Nakuha sang Gilas Pilipinas Youth ang gold medal sa Fiba U16 Asia Cup Seaba Qualifiers kag nagtapos pa nga may undefeated record.
6-0 ang Pilipinas matapos gintambakan ang Indonesia, 70-40, sa final round sa Bren Z. Guiao Convention Center sa Pampanga.
Sa imbukada pa lang nga period, 21-5 na ang skor, naglab-ot sa 41-20 ang lead sa halftime, kag nagdangat sa 59-25 nga amo ang pinakadaku nga abanse sang masobra uno minuto ang nabilin sa third period.
Wala naman sang player ang Indonesia nga naka-double digits sa hampang.
Ini na ang ikaduha nga tion nga nagkitaay ang Pilipinas kag Indonesia sa sini nga Seaba qualifiers, kun sa diin daog man ang Gilas sa una nga hampang, 77-68.
Magluwas nga nakuha sang Philippine team ang gold, kuwalipikado na ini sa FIBA U16 Asia Cup nga patigayunon sa Mongolia. Sulod man sa amo nga Asian tournament ang Indonesia nga silver medalist, kag ang Malaysia nga amo ang nagapangatlo.
