Ginalantaw sang mga otoridad nga dako ang mabulig sang Non-Contact Apprehension Policy (NCAP) sa pagdisiplina sang mga motorista sa syudad sang Iloilo, kaangay sa implementasyon sini sa Metro Manila.
Sa interview sang Bombo Radyo kay Retired Colonel Uldarico Garbanzos, head sang Traffic and Transportation Office, iya ginpahayag nga epektibo gid ang amo nga polisa bangud nga hindi na kinahanglan pa nga personal nga i-apprehend sang traffic enforcer ang motorista, kundi paagi na lamang ini sa Closed Circuit Television (CCTV) cameras nga naga-monitor sa mga dalanon.
Suno kay Garbanzos, kun may traffic violation ang isa ka motorista, madasig lang ini makilala paagi sa plate number nga malantaw sa CCTV footage.
Dugang pa sang natungdan, may posibilidad nga ipatuman man ang NCAP sa Iloilo City, ilabi na nga may yara na sang mga preparado nga CCTV cameras nga nahamtang sa pila ka operation centers sa syudad.
Gin-athag man ni Garbanzos nga kun mapatuman ang NCAP, wala sang pagbuhin sa mga traffic enforcer, bangud kinahanglanon gihapon ang ila presensya sa mga lugar nga may traffic management operations, ilabi na sa mga intersections kag lugar nga may mataas nga volume sang salakyan.
Ginalauman sang mga otoridad nga paagi sa NCAP, mas mapaayo pa ang dalagan sang trapiko kag madugangan ang disiplina sang mga motorista sa syudad sang Iloilo.
