Ginpangsulod sa gate sa isa ka puluy-an ang mga motorsiklo nga naka-park sa bahin sang atubang sang Barangay Hall sang Brgy. Calaparan, Arevalo, Iloilo City.
Ginapahayag nga ginpangsukot sang isa ka libo ang mga tag-iya sang motor agud nga magawad ini.
Sa interview sang Bombo Radyo kay Antonio Iturraga, Kagawad sang Calaparan, Arevalo, iya ginpahayag nga kagab-i, may ginpatigayon sila nga summer league para sa mga kabataan nga ginhiwat sa barangay hall.
Suno kay Iturraga, may mga nagtambong sa kahiwatan kag may mga nagdala man sang ila motorsiklo kag didto gin-park sa nasambit nga lugar.
Paathag sini, may nakabutang na nga daan nga senyales nga ‘No Parking’ kag kon magalapas, may multa nga P1,000.
Depensa sang mga tag-iya sang motorsiklo, makadali lamang sila nga nag-park kag tumalagsahon lamang ang amo nga aktibidad sa ila barangay.
Sang nagpadulong naman ang kagawad sa balay sang ginpahamtangan sang mga motor, tatlo na lang ang ila naabtan kag ang iban ang natigayon nga mapaguwa kasunod sang istoryahanay.
Pahayag sang tag-iya sang balay, bangud sa magamay ang space sa dalan, may tion nga nagasgasan ang iya salakyan bangud sa mga naga-park sa atubang sang iya balay rason nga ginbutangan sini sang no parking sign.
Matapos nga nakuha na ang tanan nga motor, may isa naman nga nabilin kon sa diin, may komprontasyon pa nga natabo.
Natigayon naman ini nga nakuha sang tag-iya sang motor matapos nga gin-istorya sang isa pa ka barangay kagawad.
