Nagpatigayon sang importante nga meeting ang Iloilo City Hall upod ang Iloilo City Health Office kag ang Social Hygiene Clinic kahapon nga adlaw agud estoryahan kag hibaluon ang kabug-usan nga kaso sang Human Immunodeficiency Virus (HIV) sa syudad sang Iloilo.
Sa interview sang Bombo Radyo kay Gab Umadhay, Focal Person sang Iloilo City Office of LGBT Affairs, iya ginpahayag nga ang nagapanguna nga rason sang HIV transmission amo ang pagpakighilawas, partikular sa mga kalalakinhan nga may relasyon sekswal sa pareho nga lalaki.
Suno kay Umadhay, may dako nga papel ang mga unibersidad kag iban pa nga academic institutions sa pagpugong sang paglapta sang HIV.
Ginpabutyag niya nga kinahanglan na nga pasangkaron ang pagtudlo sang safety sex ukon responsible sexual behavior sa mga estudyante agud nga mangin mas may ihibalo sila sa prevention sang virus.
Matandaan nga ginkumpirmar sang Department of Health (DOH) nga may 500% nga pagsaka sa mga kaso sang HIV sa mga kabataan nga naga-edad 15 tubtob 25 anyos halin Enero tubtob Marso 2025.
Bangud sini, nagpanugyan si Umadhay sa tanan, ilabi na sa mga kabataan, nga maggamit sang mga preventive measures pareho sang consistent nga paggamit sang condom kag regular nga HIV testing agud malikawan ang transmission sang virus.
