Nagpasalig ang Police Regional Office 6 (PRO-6) nga pagasabton nila ang pagpabulong sang isa ka 18-anyos nga estudyante nga nabungguan sang ambulansya sa bahin sang Dungon B, Jaro, Iloilo City.
Ang biktima amo salyas Bebe, 18, estudyante, samtang ang ang driver naman sang nasambit nga ambulansya ang isa ka Police Corporal.
Sa interview sang Bombo Radyo kay PLT. Colonel Arnel Solis, spokesperson sang Police Regional Office 6, iya ginpahayag nga halin sa banwa sang Pavia ang nasambit nga ambulansya kag pakadto kuntani sa importante nga transaksyon sang natabo ang insidente.
Suno kay Solis, samtang nagapadulong ang ambulansya, hinali nga may babayi nga nagtabok sa pedestrian lane, rason nga nadulaan sang control ang driver.
Gilayon man nga gindala sa malapit nga ospital ang biktima nga bangud ini ang nakaagum sang head injury tuga sang mabaskog nga impact sa diin guba man ang bumper kag windshield sang amo nga ambulansya.
Ginklaro man sang opisyal nga may kompleto nga dokumento ang driver kag ini ang una nga tion nga na-involve ini sa aksidente.
Ginalantaw na karon sang mga otoridad ang mga CCTV footage sa lugar kag padayon ang imbestigasyon, kag ang driver ang yara na sa kustodiya sang Iloilo City Police Station 3.
Ginpabutyag man sang PRO-6 ang ila suporta sa pamilya sang biktima kag ginasiguro nga makabaton sang nagakaigo nga bulig.
