Mas nagainit pa ang istorya sa tunga sang Kamara kag Senado kaangot sa isyu kun madayon ukon indi ang impeachment trial ni Vice President Sara Duterte.
Natabo ang word war matapos nga gin-isol ni Senate President Chiz Escudero ang pagbasa sang articles of impeachment sa Hunyo 11 sa baylo sang orihinal nga schedule ini nga Hunyo 2.
Apisar may statement si House Speaker Martin Romualdez nga ginatugyan na nila sa Senado ang impeachment case, may iban naman nga mamalidha nga nagpaguwa sang statement nga nagaduso sa upper chamber nga magpadayon na sa trial. Ang orihinal nga nag-endorso sang impeachment complaint ang hayagan pa gani nga nagpamangkot kay Escudero kun nahadlok bala ini kay Duterte.
Sabat naman sang Senate President, daw kaangay nga naanad ang pila ka mga kongresista nga diktahan ang Senado sa kun ano ang gusto nila matabo. Suno sa iya, kun may mga mamalidha nga sunod-sunuran kay Speaker Romualdez, dapat nila hangpon nga indi ini paghimuon sang Senate.
“Ang mga kongresista tila nasasanay na diktahan ang Senado kaugnay sa gusto nilang mangyari sa impeachment. Pwes, kung trabaho ng ilang mambabatas na maging sunud-sunuran kay Speaker Romualdez na gusto klaro ang impeachment na ito, hindi naming trabaho ‘yan sa Senado,” pahayag ni Escudero, Hunyo 4. “Hindi ko rin trabaho ‘yan bilang taga-pangulo ng Senado. Para sa akin, gagampanan namin ang aming tungkulin ayon sa aming paniniwala na tamang proseso na naaayon sa batas,” sabat sini.
“Noong inupuan nila na mahigit dalawang buwan itong impeachment complaint, may narinig ba sila sa amin?” pagkwestyon man sini sa mga kongresista. Himuon ang impeachment trial suno kay Chiz nga santo sa kun ano ang husto nga proseso sa idalom sang layi.
Nagsabat naman sa Senate official ang pila ka mga mamalidha lakip na si Manila 2nd District Representative Rolando Valeriano nga nagsiling nga ang iya boto agud iimpeach si Sara sang nagligad nga Pebrero ang indi bangud sa sugo ni Romualdez.
“My vote on the impeachment is the vote of the second district of Manila. That was proven in the last election. I was elected again for a third term,” suno kay Valeriano.
Sabat naman ni Bataan Rep. Geraldine Roman, wala sila ginadiktahan sang House Speaker. Wala sang basehan ang pahayag sang senate president suno sa iya.
Pahayag pa sini, ang panawagan lamang nila amo nga sundon ang Konstitusyon, kag wala man sila nagamando sa Senado kun i-convict nila ukon i-acquit ang bise-president sa impeachment trial.
“I do not think there is basis for what Senate President Chiz Escudero said,” suno kay Roman.
Sa statement naman ni Gabriela Representative Arlene Brosas, ginpahayag sini nga wala sila nagasunod-sunod lang sa Speaker, bangud kilala sila sa Makabayan nga may independence. Indi na dapat paglainon pa ang isyu suno kay Brosas, kag sabton na lang ang pamangkot kun san-o ang impeachment trial kag kun ngaa wala pa ini gina-umpisahan.
“Makabayan is not subservient to the Speaker of the House. We all know that. Because Makabayan has independence,” kabahin sang statement ni Brosas. “Let’s not divert the issue to other matters, just answer the question. When will the impeachment trial be? Why hasn’t it started?”#
