Skateboard ang nangin sagang sang isa ka Person with disability (PWD) sa mga pagpanghangkat nga iya naagyan agud makagradwar sa Iloilo State University of Fisheries Science and Technology (ISUFST)- Dumangas Campus.
Ini amo si Jefferson Dela Peña, 26-anyos, residente sang Dumangas, Iloilo apang nabun-ag sa Bacolod City.
Sa interview sang Bombo Radyo kay Dela Peña, iya ginpahayag nga apisar sang iya kasablagan, wala ini nangin upang agud malab-ot sini ang iya handom nga makatapos sa kurso nga Bachelor of Science in Information Technology (BS IT).
Suno kay Dela Peña, ginakonsiderar sini nga pagpanghangkat amo ang ulan nga iya masugata sa iya pagtuon nga nagdala man sang kabudlay ilabi na nga siya ang wala sang duha ka tiil.
Dugang sini nga indi nangin mahapos nga magsakay sa skate board kon basa kag malutak ang dalan.
Apisar sini, wala man niya ginakahuya ang iya kahimtangan bisan pa nga mabudlay.
Nangin rason pagid ini kay Dela Peña, agud lab-uton pa ang mas masangkad nga buwas-damlag.
Nagpasalamat man ang natungdan sa iya pamilya kag himata nga nagsuporta sa iya tubtob sa siya ang naka-gradwar.
Sa maragtason nga hitabo, ang Iloilo State University of Fisheries Science and Technology naghatag sang mga degree sa 1,825 ka mga graduates—lakip ang 74 ka magna cum laude kag 324 ka cum laude honorees.
