Nalakip ang anum ka tuig nga bata nga babaye sa grupo nga gin-aresto sa Myanmar bangud sa pagpatay sa isa ka retired military officer sang nagligad nga bulan.
16 tanan ka mga indibidwal ang ginpangdakop kun sa diin 13 ang mga lalaki kag tatlo ang babaye.
Ang 6-anyos nga bata ang anak sang ginaalegar nga assassin. Naka-blur ang itsura sang bata sa online version sang newspaper apang kit-anon naman sa iban nga social media posts sang junta authorities.
Gintawag sila sang militar sang Myanmar nga mga “terorista” kag amo ang ginatudlo nga sa likod sa pagluthang kay Cho Htun Aung, 68, isa ka retired brigadier general nga naka-serbe man anay bilang ambassador.
Ang pagpatay sa iya sa Yangon sang Mayo 22 amo ang isa sa high profile assassinations sa Myanmar halin sang natabo ang civil war nga nag-umpisa sa kudeta sadtong Pebrero 2021.
Una na nga nag-ako ang anti-junta insurgent group nga Golden Valley Warriors nga sila ang nagpatay sa retired general bangud sa iya padayon nga pagsuporta sa military operations lakip na sa pagpang-atake sa mga sibilyan.
Nahibaluan nga halin sang nagsugod ang kudeta sa amo nga pungsod, 29,000 na ka mga tawo ang ginpangdakop sang awtoridad lakip na ang masobra 6,000 ka mga babaye kag 600 ka kabataan sandig sa record sang activist group nga Assistance Association of Political Prisoners.
