Nag-release ang Department of Agriculture (DA) sang P10 million para sa pesticide procurement agud matapna na ang red-striped soft scale insects (RSSI) infestation nga amo ang daku nga pagpanghangkat sa sugar production sa Negros Island.
Suno kay Agriculture Secretary Francisco Tiu Laurel Jr., paagi sa suporta sang Sugar Regulatory Administration (SRA), ginalauman nga madasig nga matapna ang infestation.
Nagmandu man mismo si President Ferdinand Marcos Jr. sa DA nga tapnaon gilayon ang infestation kag maghimo sang tikang nga malikawan nga maglapta pa ini sa Negros.
Base sa SRA data, sa Visayas region nagahalin ang 71% sang national sugar output kun sa diin ang kontribusyon sang Negros Island pa lamang nagalab-ot na sa 63% sang total.
Ang iban pa nga nagaamot sang produksyon sa Visayas amo ang sugar plantations sa Panay, Cebu, kag Leyte.
