Nagalaoy ang pila ka mga manugbaligya sa Super ukon sa Iloilo Terminal Market sa Iloilo City Proper bangud sa stagnant water sa ila pwesto nga nagaapekto sa ila palangabuhian.
Partikular nga namensyonar ang area sa corner De Leon-Mabini kag corner De Leon-Fuentes kun sa diin nahamtang ang baligyaan sang mga prutas kag utan amo man ang karne.
Sa interview sang Bombo Radyo kay alias Nene, isa ka manugbaligya, iya ginpahayag nga daw kaangay nga pinabay-an ang sitwasyon apisar nga nagabayad man sila sang renta sa ila pwesto kada bulan.
Pahayag sini, bisan nga gamay lang nga ulan, nagalaputyak ang ila area, kag apisar nga napalab-ot na nila ang reklamo, wala pa gihapon na-address ang ila nga concern.
Ginakahangaw-an sini nga maglala ang ila pwesto subong nga nagsugod na ang tig-ululan.
Sa interview naman sang Bombo Radyo kay Eddie Britanico, isa ka barbero nga yara man sa Iloilo Terminal Market, iya ginpahayag nga kun mag-ulan kag magtaob, nagasulod ang tubig kag nagatuga sang huol sa ila nga mga customer.
NAGPADALA SANG DECLOGGING TEAM
Nakalab-ot naman sa igtalupangod sang Iloilo City Engineer’s Office ini nga problema.
Suno kay Joel Gerasmia, chief of staff sang amo nga opisina, nagpadala na ang talatapan sang declogging team agud nga ma-address ang concern.
Kaangot naman sa reklamo nga makapila ka beses nga napalab-ot sa ila ang problema, nagsabat si Gerasmia nga wala pa sila sang nabaton nga report bangud bag-o lang nagsugod ang pag-ulan-ulan.
Apang sa walkthrough nga ginpatigayon sa Mabini-de Leon suno sa iya, may nakit-an na sila nga narusdak nga drainage bangud sa nagalabay nga dalagku nga mga truck.
Matapos nabaton ang report subong nga hapon, naghulag ang team agud nga pasuyupan ang stagnant water kag ma-address ang problema sang vendors.
Nahibaluan nga may gintukod ang city government nga Drainage Task Force agud nga makahimo sang comprehensive assessment sa drainage infrastructure kag matumod ang critical flood-prone areas.
Sandig sa Executive Order 46 nga gin-isyu ni Mayor Jerry Treñas, kinahanglan gid nga ma-koordinar ang mga pagpaninguha nga matapna ang pagbaha kag masiguro nga magamit sang maayo ang drainage system sa Iloilo City.#
