Ginatun-an sang Department of Agriculture (DA) ang posibilidad sang pagpatuman sang minimum buying price ukon “floor price” sa palay.
Para ini sa traders ukon sa middlemen agud nga mapasiguro sang gobyerno nga mabaligya sang local rice farmers ang ila nga ani sa maayo kag patas man nga presyo.
Suno kay DA Marketing and Consumers Affairs Assistant Secretary Genevieve Guevarra, nagabakal ang traders sang palay sa indi rasonable nga presyo nga P11 ukon P12. Kinahanglan suno sa iya ang minimum buying price para madiktahan indi lamang ang National Food Authority (NFA) kundi pati ang rice traders nga nagabakal sa local farmers.
Suno sa DA official, target nga mapatuman ang “floor price” sa palay antes magtakop ang tuig.
Sang nagligad nga bulan, matandaan nga nagpahayag si Agriculture Secretary Francisco Tiu Laurel Jr. nga may traders sa masobra 30 ka areas sa Luzon nga gina-imbestigaran bangud sa pagbakal sang palay sa local farmers sa tuman ka nubo nga presyo.
