Gin-athag sang Philippine National Police (PNP) nga ang tanan nga pag-aresto nga ginahimo sang mga kapulisan dapat may legal nga basehan.
Ginpahayag ini matapos ang pahayag sang bag-o nga PNP chief nga si Nicolas Torre III, nga ang record sang isa ka pulis sa pag-aresto pagabasehan sa pagdesisyon kon ini siya angay i-promote ukon indi.
Ginklaro ni PNP spokesperson Police Brigadier General Jean Fajardo nga ang numero sang maaresto sang isa ka pulis isa lang sa apat ka criteria para sa promotion, kaupod sang edukasyon, eligibility, kag training.
Suno kay Fajardo, ang pahayag ni Torre kabahin sang ila ginapalig-on nga kampanya batok sa krimen, kag indi lang ini nagaaplikar sa mga drug suspects.
Sa nauna nga pahayag, ang Commission on Human Rights (CHR) nagpanawagan kay Torre nga magpagwa sang klaro nga direktiba nga nagasiguro nga ang mga maaresto indi lang base sa kadamuon kundi dapat nagasunod sa husto nga proseso.
Dugang pa ni Fajardo, ginahingyo man ni Torre ang mga pulis nga mag-aksyon dayon kon may makita sila nga krimen samtang naga-patrol. Ini kabahin sang iya inisyatibo nga pataason ang presensya sang kapulisan sa komunidad.
Ginsiling man ni Fajardo nga ang PNP magapatuman sang 5-minutes nga response time para sa mga pulis sa Metro Manila kag sa iban nga daku nga siyudad pareho sang Cebu, Davao, kag Iloilo.
