Mahimo na makasulod sa Pilipinas nga wala sang visa kag makaistar sulod sang 14 ka adlaw ang mga turista halin sa India umpisa subong nga adlaw, Hunyo 8, 2025.
Suno sa Department of Foreign Affairs (DFA) ang ini nga visa-free nga kasugtanan ginpatuman agud mapabaskog ang turismo halin sa India, nga may pagtaas sang 12% sa tuig 2024, kag naglab-ot sa kapin 80,000 ka bisita, base sa datos sang Department of Tourism.
Bisan pa man may pagtaas, nagamay lang gihapon ang porsyon sang Indian tourists nga nagakadtu sa Pilipinas kumparar sa kapin lima ka milyon nga nagtiner sa Southeast Asia sang nagligad nga tuig.
Para naman sa mga Indian citizens nga may valid kag aktibo nga visa ukon residence permit sa America, Japan, Australia, Canada, Schengen area, Singapore, ukon United Kingdom (AJACSSUK), pwede makaistar sulod sang 30 ka adlaw nga wala sang visa, kag kinahanglan lang magpresentar sang:
Valid passport sa sulod sang anom (6) ka bulan pagkatapos sang ila istar, kag ang return ukon onward ticket sa ila masunod nga destination country.
Ang bisan sin-o nga magatransit lang sa Pilipinas ukon magasulod para sa malawig nga istar kag indi-turismo nga aktibidad, kinahanglan gihapon magkuha sang Philippine visa sa embahada ukon konsulado sang Pilipinas sa ila lugar sang pagkatawo, lugar sang legal residence, ukon bisan diin nga pungsod nga nagakinahanglan sang entry visa para sa mga Indian citizens.
