Lantawon sang Iloilo City Government kun ano ang nangin lapses sa tagdumalahan sa Balay Dalayunan sa Bo. Obrero, Lapuz, Iloilo City matapos nga may nakapalagyo na naman nga mga menor de edad.
Apat ka Children in Conflict with the Law (CICL) ang na-report nga naka-eskapo sang Byernes sang kaagahon, apang duha pa lang ang natigayon nga nabalik sa pasilidad.
Sa sini nga latest nga hitabo, ang naka-guwa sa pasilidad amo ang isa ka 15-anyos, duha ka 16-anyos, kag isa ka 17-anyos.
Sa interview sang Bombo Radyo kay Teresa Gelogo, head sang City Social Welfare and Development Office (CSWDO), iya ginpahayag nga abilidaran gid ang mga bata nga nakaguwa gihapon bisan pa nga may jail personnel na kag may worker pa halin mismo sa syudad.
Padayon naman ang kooperasyon sang ginikananan sang CICL agud nga mabalik ang ila mga bata sa nasambit nga youth home. Ginapahayag nga duha pa lang sa apat ang nakabalik sa facility.
Kun matandaan, sang Pebrero, may nakapalagyo man nga kabataan sa Balay Dalayunan matapos ginguba ang window grills sa second floor kag gingamit naman ang ila mga habol agud makapanaog. Sang amo nga tion, na-involve pa ang amo nga mga kabataan sa holdup incident sa Quirino Bridge sa Barangay President Roxas, City Proper.#
