Nagpahanumdum ang mga otoridad sa peligro nga dala sang lahar halin sa Bulkang Kanlaon, samtang nagabaskog ang habagat nga magadala sang mabaskog nga ulan sa Negros Island.
Nagpanawagan ang Philippine Institute of Volcanology and Seismology (PHIVOLCS) sang mas mataas nga paghalong halin sa mga pumuluyo nga naga-istar sa palibot sang bulkan, bangud ang padayon nga ulan dulot sang southwest monsoon posible magaresulta sa delikado nga lahar kaupod sa pag-anud sang abo, bato, kag debris nga dala sang tubig.
Suno sa abiso sang PHIVOLCS sang Hunyo 6, nga may ara kun kaisa sang mabaskog nga ulan sa Negros Island sa masunod nga mga bulan, posible nga magkadto ang lahar sa mga suba nga magadiretso sa southern nga bahin sang Kanlaon.
Naggwa ini nga pahibalo pagkatapos nagreport ang mga netizen kag lokal nga opisyal natuhoy sa lahar nga nag-ilig sa La Castellana, Negros Occidental, partikular sa Buhangin River malapit sa Hacienda 92 Bridge sa Barangay Sag-ang, kag sa Ibid Creek sa Barangay Biak-na-Bato.
Nagpaandam ang PHIVOLCS nga ang lahar posible magtabon kag mag-anod sang mga komunidad sa tunga kag ubos nga bahin sang bulkan.
Nagpagwa man sang alerto ang Office of Civil Defense (OCD) Region 6, nga nagpanawagan sa mga residente nga malapit sa mga suba kag sapa sa palibot sang bulkan nga mag-aligmat kag magsunod gilayon sa mga mando sang pag-evacuate halin sa lokal nga otoridad.
Padayon nga yara sa Alert Level 3 (magmatic unrest) ang Bulkang Kanlaon, nga nagakahulugan nga aktibo gihapon ini kag may posibilidad sang pag-alburuto.
Ginastriktuhan sang PHIVOLCS nga wala sang tawo dapat magapuyo ukon magsulod sa sulod sang anom ka kilometro nga Permanent Danger Zone (PDZ).
Ginapahanumdom naman ang publiko nga mangin preparado sa posibilidad nga pag-ulan sang abo nga delikado sa ikaayong-lawas ilabi na ang may ginabatyag ukon sakit sa baga kag tagipusuon nga dapat magsuksok sang face mask ukon panapton kontra sa ashfall.
