Samtang nagapadayon ang pag-recover sa mga bangkay sa natabo nga plane crash sa India, isa ka lalaki ang nakit-an nga milagro nga nakaluwas.
Ini amo si Vishwash Kumar Ramesh, isa ka British citizen nga nakapungko sa 11A, sang natabo ang trahedya nga nagpatay sa masobra 200 nga mga tawo.
“Thirty seconds after take-off, there was a loud noise,” pahayag sini sa atubang sang reporters. “There were dead bodies around me. I got scared. I got up and ran. There were pieces of the plane everywhere.”
Naglapta na ang video sini sa social media kun sa diin makit-an ang impact injuries sa iya lawas. Nagakiang-kiang ini, may gisi ang bayo, kag may dugo ang nawong sang nakit-an sang mga tawo.
Tumandok sang India si Ramesh apang nagapuyo sa London sa nagligad nga duha ka dekada kaupod ang iya asawa kag anak. Nagbalik ini sa India para kuntani sa family reunion apang natabo ini nga trahedya.
Sa inisyal nga impormasyon, kaupod niya sa flight ang iya utod nga si Ajay Vishwaskumar nga missing pa subong.
242 ang sakay sang eroplano sang nag-crash ini sa residential area partikular sa medical college hostel sa guwa sang airport sa Ahmedabad. Pakadto kuntani ini sa Gatwick Airport sa London.
Sa mga na-recover nga bangkay, wala pa sang kumpirmasyon kun ini mga pasahero ukon mga tawo nga yara na nga daan sa area kag nadalahig lang sang natabo ang plane crash.
Ginhingyo na sa mga himata nga maghatag sang DNA samples agud matumod ang mga nagkalamatay suno kay state health secretary Dhananjay Dwivedi.
“The building on which it has crashed is a doctors’ hostel… we have cleared almost 70% to 80% of the area and will clear the rest soon,” suno sa senior police officer sa amo nga syudad.
Sa inisyal nga report halin sa Air India, ang ila mga pasahero nagalakip sang 217 adults, 11 ka kabataan, kag duha ka mga lapsag. Sa sini nga numero, 169 ang Indian nationals, 53 ang Britons, pito ang Portuguese, kag isa ang Canadian.
Sandig sa Aviation tracking site nga Flightradar24, ang involved sa insidente amo ang Boeing 787-8 Dreamliner nga isa sa pinaka-moderno nga passenger aircraft nga ginagamit subong.
Base pa sa Aviation Safety Network database, ini ang una nga crash sa Dreamliner nga nag-umpisa sang commercial nga pagpalupad sang eroplano sadtong 2011.#
