Nagakulumuron na ang mga barangay officials kag pumuluyo sang Barangay Dulonan, Arevalo bangud sa ginpa-untat nga contruction sang ila multi-purpose hall nga ginsuguran sang 2015, apang wala pa gihapon matapos tubtob subong nga tuig.
Sa interview sang Bombo Radyo kay Rodolfo Villegas, kapitan sang nasambit nga Barangay, iya ginpahayag nga 50% pa lang ang natapos antes ini ginpa-untat sang tuig 2022.
Suno kay Villegas, nagatinulo na ang babaw nga porsyon sang atop sang nasambit nga hall, nga nagapadugang pa gid sang problema.
Apektado na subong ang mga kabataan nga naga-eskwela, bangud ang idalum sang building ginhimo bilang daycare center.
Ang multi-purpose building kuntani ang maga-serbe bilang barangay hall, daycare center, kag venue sang mga aktibidad sa komunidad.
Apang tungod sang pag-untat sang construction, limitado ang gamit sang pasilidad kag nabudlayan ang barangay sa pagpatigayon sang mga serbisyo.
Sa subong, ginahulat pa sang mga barangay officials ang desisyon ni Iloilo City Lone District Representative Julienne Jamjam Baronda kun san-o liwat mapadayon ang pagpaobra sang nasambit nga building.
