Ginradyuhan sang apat ka mga barko sang China ang mga barko sang Pilipinas nga yara sa West Philippine Sea.
Suno sa Philippine Coast Guard (PCG), natabo ini samtang nga naga-deploy ang Filipino vessels sang 20 ka floating aggregate devices (FADs) sa Hasa Hasa kag Kanduli Shoals halin sang Lunes tubtub kahapon, Hunyo 18.
Ini nga devices nga mas kilala nga payao amo ang ginagamit agud nga mas madamo nga isda ang mahulik.
Suno sa PCG, apat ka China Coast Guard (CCG) vessels ang nag-isyu sang radio challenge kag naghimo pa sang delikado nga mga pag-maneuver sa mga barko sang PCG kag Bureau of Fisheries and Aquatic Resources (BFAR).
Kalmado naman kag may propesyunalismo nga nagsabat ang Filipino crew kag radio operators, kag nangin madinalag-on sa ila nga maritime presence.
Sa amo nga operasyon, lakip sa nagkadto sa West Philippine Sea amo ang mga sakayan sang mga manugpangisda nga Pinoy, tatlo ka PCG vessels, kag duha ka barko sang BFAR.
