Gintuad sang Tubungan Municipal Police Station nga antes pa man nila madakpan ang suspek nga si Aljohn Jalbuna nga nagpatay sa dalaga sa Ingay, Tubungan, madamo na sila sang nakuha nga impormasyon tuhoy diri base sa iya nga background.
Si Jalbuna amo ang nag-ako nga nagpatay sa 18-anyos nga si alyas Jeje, isa ka incoming first year college student.
Sa interview sang Bombo Radyo kay Police Lieutenant Neil Eric Goniabo, deputy commander sang Tubungan PNP, iya ginpahayag nga matapos sila nagtukod sang special team para magtutok sa kaso, na-validate nila nga kilala ang suspek nga nagapangsaka sang mga balay kag may record sang pagpangawat.
Suno kay Goniabo, diri pa gid nagbakod ang ila pagduda sa suspek kag ginpadulungan nila ang puluy-an sini kag naabtan nila ini didto kag nakit-an ang mga pilas sa liog ni Jalbuna.
Sang ila ini gin-istorya, didto na nag-ako ang suspek.
Pahayag ni Goniabo, apisar wala man sang ginaako ang suspek nga may mga upod ini sang ginhimo ang krimen, wala ginadula sang otoridad ini nga posibilidad.
Ini bangud ginapanindugan sang suspek nga wala niya ginhimuslan ang biktima nga baliskad naman sa resulta sang autopsy nga nagakumpirma nga may natabo nga sexual abuse sa dalaga.
