May mga reklamo na nga daan batok sa 33-anyos nga si Aljohn Jalbuna antes ini nag-ako nga siya ang nagsulod sa balay sa Barangay Ingay, Tubungan, Iloilo kag nagpatay sa 18-anyos nga dalaga.
Ini man ang rason kun ngaa nalakip ang iya pangalan sa pito ka persons of interest nga ginsundan sang Tubungan Municipal Police Station.
Sa interview sang Bombo Radyo kay Police Lieutenant Neil Eric Goniabo, deputy commander sang Tubungan PNP, iya ginpahayag nga madamo na sila sang may nabaton nga impormasyon tuhoy sa suspek kun sa diin nangin bantog ini siya nga nagapanulod-sulod sa mga pamalay sang mga pumuluyo sa nasambit nga lugar.
Gilayon nga ginpadulungan sang mga otoridad ang puluy-an sang suspek bangud sang impormasyon nga ila nabaton, upod ang bulig sang Punong Barangay nga si Leonardo Tamises.
Pag-abot sa lugar, nadiskubrehan sang mga pulis nga may madamo nga kinarusan ukon pilas sa liog ang suspek.
Ginklaro ni Goniabo nga wala nagsungka ang suspek sa estasyon, kundi ini ang ginkadtuan sang kapulisan mismo sa iya balay agud madakop.
Wala naman ini nagbato pa kag nag-ako na sa iya nga ginhimo nga pagpatay sa dalaga.
Sa pihak nga bahin, gin-ako sang suspek nga ini siya ang naga-gamit sang iligal nga droga.
Suno kay Jalbuna, duha na siya ka bulan nga naga-gamit sang droga kag ginbuyagyag man sini nga nagakuha sila sang suplay sa Villa kag Mandurriao area sa syudad sang Iloilo.
Gintuad sini nga antes niya ginsulod ang kwarto sang 18-anyos nga dalaga, nakagamit na ini sang shabu.
Hugot nga ginpanginwala sang suspek nga ginhimuslan sini ang dalaga kun sa diin tuyo niya lang kuntani nga kibuton ini.
