Ginpamatud-an sang isa ka graduate sang John B. Lacson Foundation Maritime University, Arevalo, nga wala sang sin-o ukon ano man ang sarang nga makapugong sa butang nga luyag lab-uton sang isa ka indibidwal nga nagatuo sa Diyos kag nagapati sa gahum sang handom.
Ini amo si Edrian Mikel del Rosario,22 anyos, residente sang San Fernando, San Jose, Antique, kag nagtapos sa degree program nga BS Marine Transportation.
Sa interview sang Bombo Radyo kay Del Rosario, iya ginpahayag nga bata pa lamang, nakamuklat na siya sa realidad sang kapigaduhon sang ila kabuhi bangud wala sang trabaho ang iya iloy kag contractual naman ang ubra sang iya amay sa isa ka ahensya sang gobyerno.
Suno kay Del Rosario, nagbudlay pa gid ang ila kahimtangan sang napatay ang iya tiyo sang 2016 gani napilitan siya nga magpangita sang pamaagi agud makakwarta kag makabulig sa pamilya.
Pahayag niya, nagsugod siya sa pagbaligya sang polvoron nga ginaluto sang iya amay kag ginabaligya niya sa eskwelahan kag sa ila lugar.
Humalin sadto, kabahin na sang kabuhi ni Edrian ang pagpangita sang sideline agud makakwarta kag nadala niya ini sa pag-eskwela sa kolehiyo sa unibersidad nga nahibaluan niya nga indi man basta-basta ang gastuhon sa pagtuon.
Sa iya pag-eskwela sa kolehiyo, nangin working student ini nga ginabalanse ang pag-eskwela kag responsibilidad sa eskwelahan.
Wala pa nakapoy, nagtrabaho man ini bilang mascot, nagbaligya sang uga, ube halaya, kutsinta, waffles, kimchi kag iban pa basta siya ang makaginansya kag may pang-enroll kag pang-allowance.
Sa pihak sang iya kasakuon, wala ginpabay-an ni Edrian ang iya pag-eskwela kun sa diin ginkilala man ini nga Model Cadet sa iya unibersidad.
Sang nagligad lamang nga Hunyo 19, dungganon nga nagmartsa si Edrian sa ila graduation ceremony agud ipakita nga wala sang handom nga indi matuman sang isa ka tawo nga nakahibalo magbalikid sa ginhalinan kag napat-ud ang destinasyon nga luyag niya padulungan.
Dako gid ang iya pagpasalamat sa tanan nga tawo nga nagbulig kag nagsalig sa iya ilabi na sang tion nga lubos niya nga ginakinahanglan, indi lang ang bulig pinansyal kundi ang moral nga suporta agud magpadayon siya sa pag-eskwela.
Sa subong, maathag na sa panan-aw ni Edrian nga sa bulig sang Mahal nga Makaako, matuman gid niya ang handom para sa iya pamilya ilabi na sa iya mga ginikanan nga ginkulang man sa pinansyal nga suporta, sobra-sobra naman nga pagpalangga ang ginhatag sa iya.
