Arestado ang isa ka enforcer sang Special Action and Intelligence Committee for Transportation sang Department of Transportation (SAICT-DOTr) sa Quezon City.
Suno sa report, ginsita sang enforcer nga si alyas Manolito ang isa ka delivery rider sang parcel sa West Point Avenue bangud sa ginapahayag nga overloading.
Suno sa rider nga si alyas Joseph, ginhambalan siya ni Manolito nga posible nga ma-impound ang motorsiklo sini kag multahan pa siya sang P5,000 tubtob P20,000.
Para indi maisyuhan sang violation ticket, ginpangayuan sang enforcer ang rider sang P1,000 kag nag-ayo ang rider sang P700 kag nagsugtanay sila.
Matapos maghatag sang kwarta, gilayon nga nanugid ang delivery rider sa ila nga barangay kag ginpadakop ang nasambit nga enforcer.
Gin-ako naman sang enforcer ang iya sala kag ginsiling nga napilitan lang ini bangud kinahanglan niya sang kwarta para magpa-check up sa iya nga sakit sa korason.
