Malab-ot 204,000 pesos ka balor sang shabu ang nakumpiskar sang Station Drug Enforcement Team sang Pototan Municipal Police Station subong nga adlaw Hunyo 25, pasado alas 6:44 sang aga.
Sa interview sang Bombo Radyo kay Police Lieutenant Adrian Baligod, deputy chief of Pototan Police Station and kag team leader sang nasambit nga buy-bust operation, iya gin pahayag nga tatlo ka semana nga ila ginabantayan ang suspek antes ini madakpan.
Ginhiwat ang operasyon sa Brgy. Zarrague, Pototan, Iloilo kag ang nadakpan nga suspek ginakilala nga si alyas “Sadam,” 34 anyos, lalaki, pamilyado kag residente man sang amo nga barangay.
Nakuha sa iya ang pito (7) ka heat-sealed nga transparent plastic sachets nga may sulod nga ginapatihan nga shabu, nga may kabug-aton nga masobra 30 ka gramos kag ginabana-bana nagakantidad sang PHP204,000 kag may street value nga PHP6,800 kada gramo.
Suno sa imbestigasyon sang mga kapulisan, nabutyagan nga halin pa sa Iloilo City ang ginasuplay niya nga illegal nga droga kag ginapanagtag ini sa Pototan, Iloilo.
Subong, yara na sa kustodiya sang Pototan Police Station ang suspek kag atubangon niya ang kaso nga paglapas sa Republic Act 9165 ukon Comprehensive Dangerous Drugs Act of 2002.
Text by: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
