Ginklaro ni Vice President Sara Duterte nga wala nagpangayo sang bulig ang iya amay sa Australia nga batunon siya kag sapupuhon pananglitan temporaryo siya nga hilwayon sang International Criminal Court (ICC).
Ini nga statement sang bise-presidente ang ginhimo matapos ang pahayag sang Australian government nga indi sila magbaton kay former President Rodrigo Duterte pananglitan nga aprubahan sang ICC ang iya petisyon para sa interim release.
Matandaan nga ang defense counsel ni Duterte nga si Atty. Nicolas Kaufman ang nag-request sang interim release sang Hunyo 12 kun sa diin ginpahayag sini nga may duha ka pungsod nga handa magbaton sa anay president.
Pahayag naman ni Sara, wala nalakip ang Australia sa duha ka nasyon nga ila ginatumod sa ila nga petisyon sa korte sa The Hague.
Suno pa sa bise-presidente, ginakonsiderar lang sang defense team ang mga pungsod kun sa diin posible ang interim release, apang wala pa sang aplikasyon nga nahimo.
Kun bukadon ang record, makit-an nga ang ICC ang may yara sang interim release agreements sa Kingdom of Belgium kag sa Argentine Republic.
Gin-reject man sang Belgium ang request sa pagbaton kay Duterte sa idalom sang interim release conditions.
Nahibaluan nga ang interim release ukon provisional release amo ang temporary discharge sa isa ka akusado nga gina-detain sang korte.
Yara subong ang 80-anyos nga former president sa ICC detention facility sa Netherlands samtang pending ang trial sa kaso sini nga crimes against humanity nga ginatudlo nga nag-ugat sa maduguon kag kontrobersyal nga drug war.
