Arestado sa buybust operation ang isa ka miyembro sang LGBTQ+ sa Bgry. Bakhaw, Mandurriao subong nga adlaw, Hulyo 2, 2025.
Sa interview sang Bombo Radyo kay PCPT Val Cambel, hepe sang Police Station 10 – Mandurriao, Iloilo, gin kilala ang arestado nga si alyas Thea, 24-anyos kag residente sang Brgy. Bakhaw Mandurriao kag ginakabig nga High Value Individual.
Nakuha sa iya ang apat (4) ka heat-sealed nga transparent plastic sachets nga may sulod nga ginapatihan nga shabu, nga may kabug-aton nga 60 ka gramos nga may standard drug price (SDP) nga Php 408,000.00.
Suno kay Cambel, nakaagi naman nga daan preso ang suspect angot sa pareho nga kaso sang nag ligad nga tuig kag nakagwa.
Sang nakagwa ini sa presohan, liwat ini nga nagbaligya sang illegal nga droga.
Dugang pa ni Cambel, nga may koneksyon ang arestado sa sulod sang presohan kung sa diin niya ginakuha ang supply kag gina-distribute sa gwa kung sa diin ang iya mga target ang mga kabataan kag mga kalalakinhan.
Sa inisyal nga interview sang kapulisan sa suspect, may mga suki ini nga gina baligyaan sa nagkalain-lain nga distrito sa syudad sang Iloilo kag amo ang Arevalo, Molo, Lapaz kag Jaro.
May ara naman sang iban pa nga list of names ang mga kapulisan nga angot sa kaso ni alyas Thea kag padayon na ang ila nga imbestigasyon.
Sa subong, ara na sa kustodiya sang Ilioilo City Police Station 10 ang suspek kag kung mag-positibo sa drug test paga-atubangon niya ang kaso nga paglapas sa Republic Act 9165 ukon Comprehensive Dangerous Drugs Act of 2002.
