Patay ang isa ka miyembro sang Philippine National Police (PNP) sang gintiro ini sang iya ugangan nga babaye gamit ang iya nga service firearm sa Brgy. Poblacion, President Quirino, Sultan Kudarat.
Ang biktima amo si PSSgt. Bobby Vegafria Nanali, 37-anyos, miyembro sang President Quirino PNP kag residente sang Purok Rose, Brgy. Poblacion.
Naggwa sa imbestigasyon nga nag-inaway ang biktima kag asawa sini nga naglab-ot sa agaway sang pusil.
Naagaw ini sang asawa kag ginhatag sa iya iloy nga yara man sa balay nila nga mag-asawa.
Nagpadulong ang biktima sa garahe para magpabugnaw apang ginsundan ini sang mag-iloy.
Nagpadayon ang away sang mag-asawa tubtob nga gintiro ini sang suspek.
Igo sa likod nga naglapos sa tiyan kag igo sa likod sang ulo ang naangkon sang biktima nga gintunaan sang iya kamatayon
Narekober sa lugar ang Glock-17 nga pusil sang biktima.
Yara naman sa kustodiya sang pulis ang suspek.
