Nagakabalaka ka bala sa imo abyan nga may indi maayo nga baho?
Luyag mo siya prangkahon apang nagaduha-duha ikaw bangud mahimo nga maglain ang iya nga buot ukon mahuy-an siya?
Indi magkabalaka bangud may yara na sang solusyon dira agud nga mahibaluan niya mismo nga may yara siya sang indi manami nga baho nga indi siya ma-offend.
Ang tawo nga may yara sang ‘body odor’ ang isa ka seryoso nga isyu.
Gani sa pungsod Japan, may yara sang high tech device nga makabulig sa isa ka tawo nga mahibaluan kun mabaho ini ukon indi.
Ginhimo ni Tanita ang isa ka handheld smell checker nga ginatawag ES-100 kag naga-analyze sang body odor sang tawo kag naga guwa ang numero humalin 1 tubtob 10 bilang intensity kun ano ka baho ang ilok sang isa ka tawo, sa diin 10 ang pinakamabaho.
Ang ini nga device ang mahapos nga gamiton.
Sa sulod sang 10 ka segundo, mahibaluan mo na gilayon ang baho sang imo nga ilok.
Kun maguwa sa device nga 0, ini buot silingon nga wala ikaw sang body odor, ang 1-4 amo ang acceptable pa nga lebel sang body odor, kun makakuha ka naman sang 5-9 ini buot silingon nga kinahanglan na nga hatagan sang igtalupangod kag kun 10 naman, kumpirmado na nga may yara ikaw sang body odor.
