Ginbawi na sang Department of Agriculture (DA) ang ginpatuman sini anay nga ban sa poultry products nga halin sa Brazil.
Ini nga South American country ang isa sa pinakadako nga poultry exporters sa bilog nga kalibutan kun sa diin nagapangatlo ini sa global chicken trade.
Suno kay Agriculture Secretary Francisco Tiu Laurel Jr., nag-isyu siya sang Memorandum Order No. 35 nga amo ang nagatapos na sang importation ban sa poultry halin sa amo nga pungsod.
Matandaan nga ginpatuman ang ban sang Mayo 19 bangud sa outbreak sang avian influenza. Gin-cover sang ban ang poultry meat, piso, itlog, kag semen.
Ginpaguwa naman ang bag-o nga memorandum sa Pilipinas matapos nag-report na ang Brazilian veterinary authorities sa World Organisation for Animal Health (WOAH) nga natapna na nila ang outbreak.
Paagi sa pagbalik sang imports halin sa Brazil, ginpahayag sang DA secretary nga natuman nila ang sugo ni President Ferdinand Marcos Jr. nga dapat lain-lain ang sources sang gina-import nga agricultural products.
