Nagalaum sa gihapon ang Malacañang nga malab-ot sang Pilipinas ang upper middle-income country status sa idalom sang administrasyon ni President Ferdinand “Bongbong” Marcos Jr.
Sa latest classification sang World Bank para sa fiscal year 2026, nakit-an nga nagapabilin gihapon ang Pilipinas nga lower-middle-income economy apisar may pagsaka sa gross national income (GNI) per capita sang 2024 halin sang 2023.
Suno kay Palace Press Officer Undersecretary Atty. Claire Castro, may plano na ang gobyerno kun paano malab-ot ang mas mataas nga status, kaangay sang pagpabaskog sang macroeconomic foundation kag pagpadayon sa mga reporma sa imprastraktura, edukasyon, digitalization kag pati na ang Private-Public Partnership Code.
“Okay, inaamin po natin sa ngayon na hindi pa po natin natutuloy ang papunta sa upper middle-income status pero maganda naman po ang nagiging progreso ng ekonomiya dahil sa gumagandang gross national income per capita simula 2024,” suno kay Castro.
“Pipilitin po natin itong maabot kahit po siguro mayroon pang mga kondisyon globally sa mga nangyayari ngayon. Dodoblehin pa rin po ang pagsisikap ng pamahalaan,” dugang sini.
Una na nga nagpahayag ang World Bank nga posible sa 2027 pa makasaka ang Pilipinas sa upper middle-income status.#
(Photo: WALTER BOLLOZOS)
