Ginakonsiderar ni Coach Tim Cone ang apat ka bag-o nga players nga maga-upod sa Gilas Pilipinas para sa pagtiglawas sa pungsod sa FIBA Asia Cup.
Ini amo sanday Rhenz Abando, Zavier Lucero, RJ Abarrientos, kag Troy Rosario.
Sanday Abarrientos kag Rosario nga players man ni Cone sa Barangay Ginebra ang nakatambong na sa una nga meeting sang Gilas sa Pasig City. Ginahulat ang duha ka iban pa bangud sa Estados Unidos pa si Lucero samtang sa Taiwan naman si Abando.
Kabahin man anay si Rosario sang Gilas nga nakadaog sang tatlo ka gold medals sa Southeast Asian Games kag nagtiglawas man sa Pilipinas sa 2019 FIBA World Cup sa China.
Lakip naman si Abando sa Gilas sang nag-host ang Pilipinas sang World Cup sang 2023, kag sa Asia Cup sang 2022 sa Indonesia.
Si Abarrientos naman ang parte man sang team nga naghampang sa 2021 FIBA Olympic Qualifying Tournament sa Serbia.
Sa pihak nga bahin, gina-verify pa sang Samahang Basketbol ng Pilipinas (SBP) kun makahampang bilang local si Lucero bangud isa ini ka Filipino-American forward.
Matabo ang continental showdown sa Jeddah, Saudi Arabia halin sa Agusto 5-17 kun sa diin nagtupa ang Pilipinas sa Group D kag natalana mag-atubang sa New Zealand, Chinese Taipei, kag Iraq.
