Nagapadayon ang pagtaas sang paggamit sang family planning sa mga kababainhan sa probinsya sang Iloilo base sa datos nga ginpahayag sa interview sang Bombo Radyo kay Dr. Maria Socorro Quiñon, head sang Provincial Health Office.
Suno sa iya, isa sa mga rason kun ngaa indi malab-ot sang probinsya ang target nga fully immunized child coverage amo ang pagnubo sang kabataan nga ginatawo, bangud man sang pagtaas sang contraceptive prevalence rate.
Halin 2020 tubtob 2024, nagapakita ang datos nga padayon ang pagsanyog sang mga kababainhan nga nagapraktis sang family planning.
Ginklaro ni Quiñon nga ang national target para sa contraceptive prevalence rate amo ang 30%, apang nalab-ot na sang probinsya ang 36.85% ukon kapin 185,000 nga mga kababainhan ang naga-praktis sang family planning.
Ini ginpasangkad paagi sa kooperasyon sang Department of Health, Provincial Health Office, Municipal Health Offices kag City Health Office.
Sang tuig 2024, masobra 19,500 na lang ang total nga live births, mas manubo kumparar sa mga nagligad nga tuig.
Ginpahayag nga damo na sang mga kababainhan sa probinsya ang aktibo nga naga-engage sa programa sang family planning, kabahin serbisyong-medikal nga programa sang gobyerno.
