Nagpabilin ang madalom nga imbestigasyon sa kaso sang pagkasapwan-patay ni Police Staff Sergeant Richard Velez, 36 anyos, pamilyado kag may tatlo ka kabataan kag residente sang Brgy. Acuit, Barotac Nuevo, Iloilo.
Nasapwan-patay ang biktam sa ika-tatlo nga panalgan sang Barotac Nuevo Municipal Police Station kaina sang aga, Hulyo 9, 2025.
Na-assign sa Barotac Nuevo Municipal Police Station si PSSg. Velez humalin pa sang 2022.
Siya man ang Chief sang Finance Section kag naka-duty halin alas-10 sang gab-i tubtob alas-6 sang kaagahon. Ginpahayag nga naka-duty siya sa oras sang insidente.
Sa interview sang Bombo Radyo kay PMAJ Rolando Araño, spokesperson sang Iloilo Provincial Police Office (IPPO), ginpahayag sini nga ginporma na sang Office of the Provincial Director ang Special Investigation Task Group agud mapadasig kag mapaimpit ang imbestigasyon sa insidente.
Samtang, ipa-idalom man sa autopsy ang bangkay sang biktima agud mahibaluan ang eksaktong hinungdan sang iya kamatayon kag makahatag sang dugang nga kasanag sa ginapatigayon nga imbestigasyon.
Una na nga ginkumpirmar nga may pilas sang pagkaluthang si Velez sa tuo nga parte sang iya ulo, sa ibabaw sang dulunggan.
Narecover man sa iya kilid ang iya service firearm nga Taurus TS9 pistol (9mm) kag may isa ka basiyo sang bala.
Ginkuhanan sang SOCO sang fingerprint ang mga ebidensya sa lugar kag ginpaidalom sa paraffin test ang mga kaupdanan sang biktima nga yara man sa istasyon sang tion sang insidente.
Padayon pa nga ginatipon sang otoridad ang mga ebidensya kag impormasyon nga makabulig mahibaloan ang matuod-tuod nga rason sa likod sang kamatayon sang nasambit nga pulis.
